Leva e seguidor
entrada circular → saída rectilíneo, segundo o perfil· non reversible
Comprende como funcionan a leva e o seguidor
O mecanismo de leva e seguidor transforma un movemento de rotación uniforme nun movemento rectilíneo ou angular segundo unha lei que depende da forma da leva.
Pódese dicir que a excéntrica é un caso particular de leva na que o perfil do disco é circular e o eixe de xiro está desprazado respecto do seu centro. Isto dá como resultado unha gráfica de movemento aproximadamente sinusoidal.
En xeral, as levas teñen un perfil variable, deseñado para a función específica que queremos realizar.
Partes do mecanismo de leva e seguidor
Este mecanismo é similar ao de excéntrica, coa diferenza de que a leva pode adoptar formas moi diversas.
Clases de levas
Segundo a súa forma, as levas máis comúns son as de disco, xa explicadas coa animación, as de tambor e as frontais.
Leva de tambor
A leva de tambor ten unha rañura tallada na superficie exterior dun cilindro. A forma desta rañura determina o desprazamento do seguidor. Ao desenvolver a superficie lateral do cilindro sobre un plano, o trazado da rañura representa a gráfica do desprazamento en función do ángulo de xiro, s(θ).
Na rañura encaixa un vástago ou un rolete unido a un seguidor que se despraza paralelamente ao eixe do cilindro. Na montaxe representada, dúas guías, unha en cada extremo do cilindro, manteñen a dirección deste desprazamento.
Leva frontal
Na leva frontal representada, o perfil está tallado no bordo dun cilindro oco con forma de vaso. O seguidor é similar ao da leva de disco, pero neste caso deslízase sobre ese bordo. A súa forma determina o desprazamento do seguidor durante o xiro da leva.
Aplicacións das levas
Seguramente, a aplicación máis coñecida das levas é o accionamento das válvulas nos motores de combustión interna. Unha árbore de levas, sincronizada co movemento do cigüeñal, acciona as válvulas de admisión e de escape no momento axeitado. Habitualmente, as levas provocan a apertura das válvulas e uns resortes encárganse de pechalas.
As levas úsanse principalmente para producir movementos automáticos que se repiten durante moitos ciclos. A súa fabricación pode resultar custosa, pero, cando se empregan durante un gran número de ciclos, poden ofrecer un custo por ciclo moi baixo respecto doutras formas de automatización do movemento.
Así, ademais de estaren presentes nos motores de combustión, podemos atopalas en máquinas-ferramenta automáticas, máquinas de coser, máquinas de imprenta e fotocopiadoras, entre outros dispositivos.