Toda unha experiencia deseñar neste entorno. Ademáis é gratis.
Biela-manivela. Animación html5 con Adobe Edge Animate
Estes días ando a darlle voltas á creación de animacións en html5. Ata agora, para facer animacións e páxinas interactivas, había traballado con tecnoloxía flash, pero achégase o tempo en que os navegadores deixarán de reproducir os arquivos .swf que tantas páxinas web animaron. Non son demasiadas os entornos gráficos que hai para crear animacións en html5. Intento buscar un entorno que me permita facer os mesmos traballos (ou parecidos) que facía cando utilizaba o programa SwishMax. A miña primeira proba foi moi satisfactoria, a animación que aparece máis abaixo, que ben podería pertencer ao traballo de mecanismos, www.tecnoloxia.com/mecanismos, está realizada en Adobe Edge Animate.
Manuel María. Poesía de auga (conversión .swf a html5)
Este ano 2016 dedícase o día das Letras Galegas ao poeta chairego Manuel María, poeta de grato recordo para min dende que no ano 2004, Un grupo de profesores do IES A SANGRIÑA da Guarda, tivemos a oportunidade de incluír no traballo: «a auga aplicacións enerxéticas na Galicia preindustrial», algúns dos seus poemas relacionados cos ríos coa auga e cos muíños.
A evolución tecnolóxica resultou ser unha ameaza para o mencionado traballo no que puxemos tantas ganas e ilusión. Resulta que a interface do traballo, presentado como unha web animada e interactiva estaba realizada en flash, e esta tecnoloxía, debido a problemas de seguridade e a estratexias empresariais, está a punto de deixar de ser funcional nos navegadores de internet.
Aproveitando estas dúas circunstancias: o feito que se dedique o día das letras galegas 2016 a Manuel María e que a tecnoloxía flash estea a punto de desaparecer dos nosos navegadores, decidín intentar recuperar para o futuro parte do traballo da «auga» empezando precisamente pola poesía de Manuel María.
Para converter os arquivos coas animacións gráficas dos poemas en flash coa extensión .swf ao estándar html5 utilicei o conversor de google Swiffy. Apareceron algúns problemillas na conversión pero o resultado é aceptable. Para organizar e dar unha visión de conxunto ás poesías de Manuel María deseñei unha páxina web sinxela utilizando Exelearning. O resultado é unha nova monografía en tecnoloxia.com. Esta é a miña homenaxe as letras galegas en 2016, quedades convidados/as a gozar dela.
II Concurso de avións de papel
O II Concurso de avións de papel IES A SANGRIÑA contou cunha numerosa participación e foi un gran éxito en canto ás marcas acadadas. Nesta edición participaron tres profesores, o que engadiu máis emoción e expectación ao concurso.
Durante os tres días que durou a competición numeróso público acudiu ao pavillón do IES A Sangriña para animar aos seus participantes favoritos. A media de público asistente superou os 250 alumnos que nesta edición foron moi ruidosos e festeiros. Os momentos de máis algarabía vivíronse durante os lanzamentos do profesor Ramón Quiroga.
As marcas dos gañadores superaron as conseguidas o curso pasado. Os tres clasificados en cada unha das categorías son:
Tempo de voo.
1º Manuel Ángel Silva Martínez 3º ESO-B 7,73 seg
2º Antonio Lomba Baz (profesor) 7,5 seg
3º Jorge Vicente Lomba 2º BACH-D 5,8 seg
Distancia.
1º Lucas Martínez López 1ºBACH-D 26,4 m
2º Víctor Álvarez Martínez 2ºBACH-A 25,1 m
3º Miguel Valiente Carrascosa 1ºBACH-B 24,9 m
Os resultados completos de tódolos participantes poden consultarse na seguinte ligazón.
Non é por presumir (Avións de papel)
Os alumnos de Electrotecnia de 2º BACH xa están traballando na organización do II CONCURSO DE AVIÓNS DE PAPEL DO IES A SANGRIÑA. Estamos na fase de revisión das bases.
Se todo vai segundo o previsto pronto publicaremos o cartel e comezaremos coa inscrición dos participantes.
Este ano temos como aliciente que a Universidade de Vigo tamén realizou un concurso de avións de papel que se correspondía cunha fase da «Red Bull Papel Wings». Eles remataron a competición a finais de febreiro. Foi sorprendente comparar os resultados dos gañadores da UVIGO cos do concurso da Sangriña do ano pasado nas modalidades nas que coincidimos.
Tempo de voo: pola Sangriña, Jorge Piedra Dorado 7,59 segundos. Pola UVIGO, Alejandro Eluga 5.09 segundos.
Distancia máis longa: pola Sangriña, Víctor Núñez Quintela 24 metros. Pola UVIGO, Abel González 21,14 metros.
Non é por presumir pero os nosos resultados son bastante mellores cos da UVIGO.
Podes acceder a información do concurso do ano pasado na seguinte ligazón.
Sígueme en: